الجيش .. المجلس العسكري !! اسلوب الإدارة

اللي دخل الجيش وقضي فترة تجنيد.. كعسكري مجند.. ايا كان مؤهله .. هايعرف كويس اسلوب تعامل ظباط الجيش مع العساكر علي انهم "مش بيفهوا".. او انهم ملهمش رأي اصلا عشان يتسمع.. مجرد استماع لأوامر الظابط.. قائد الكتيبة.. بدون نقاش, مهما كان عندك اعتراض علي موقف معين في ادارة ازمة معينة في الوحدة اللي كنت فيها..

مش عارف ليه افتكرت فترة تجنيدي في الجيش من ساعة ما المجلس العسكري مسك "إدارة شئون البلاد", المجلس شايف ان "العساكر" قصدي الشعب مغيب وغير قادر علي استيعاب الأمور .. حتي "صف الظباط" قصدي السياسيين اللي ليهم آراء مختلفة مع المجلس, لا يرقون للإستماع اصلا لآرائهم.. أو مجرد استماع شكلي عشان "الإجراءات" وبعد كدة يعملوا اللي هما عايزينه.

المجلس العسكري بيقدم تبريرات لفئة الناس اللي قاعدة علي الطشط.. مع كامل الإحترام للطشط.. أو لفئة أم عمرو بيومي الوكيل في فيلم جواز بقرار جمهوري.. "اسكت يا واد بئا هاصدقك انت واكدب التليفزيون".. ده فعلا حال ناس كتير في البلد.. بس ماينفعش اننا نعتمد علي الجهل في إدارة الأزمات.. لأن ده كان أسلوب النظام القديم.. اللي احنا اسقطناه.. أو شكنا لسة بنحاول نسقطه.. في شريحة كبيرة في البلد مثقفة ومحل ثقة وصوتها مسموع.. ومن حقها يكون رأيها مسموع للمجلس قبل مايكون مسموع للشعب.

قبل الثورة كان في الشريحة المعارضة لنظام حكم مبارك, واللي اشتركت بكل طوائفها في التجهيز للثورة.. وفضح النظام اللي كل الشعب كان حاسس بفساده وساكت,, واشتركت في الثورة مع الشعب.. الغريب بئا ان الشريحة المعارضة دي.. لسة اسمها "معارضة" حتي بعد الثورة!!!!! علامات تعجب للصبح, هو احنا عاملين ثورة عشان برضه نفضل معارضين؟؟.. طبعا مفيش غير فئة واحدة اللي مابقتش معارضة لأنها ضمنت التورتة.. وكلنا عارفينها.. اخواني المسلمين.. علي اعتبار اني مش مسلم يعني!!

خلينا في المجلس, قرارات المجلس من بداية الثورة عمري ماحسيت انها قرارات ثورية.. سواء عمليا.. زي موقفهم في موقعة الجمل .. او نظريا .. زي موقفهم من مبارك وعصابته  والتعامل القمة في الإحترام من جهة .. واسلوب تعاملهم مع الثورة من جهة اخري.. علي رأي التراس زملكاوي.. بيحسسوني ان الثورة دي كانت بالنسبة لهم نكسة.. لأنهم مابيصدقوا يلاقوا موقف ينتقموا في من الثوار.. سواء بالإهانة والضرب والتعذيب اللي حتي مش عايزين يعترفوا بيه لحد دلوقتي.. او بالمحاكمات العسكرية للثوار .. والمدنية للبلطجية وظباط الشرطة المدانين في قتل الثوار

اللي انا شايفه دلوقتي عصر جديد من القهر اقوي من القهر في عصر مبارك.. واكتر حاجة ماكنتش اتمناها .. ان الجيش مايبئاش داخلية تانية.. وأكثر قسوة من الداخلية.. واكثر غباء سياسي من الداخلية.. لأن الداخلية كانت تبريراتها احيانا معقولة.. وكان عندها القصص المفبركة اللي بتقدر تغطي بيها علي جرايمها.. لكن لما الجيش تبئا جرايمه متصورة فيديو.. والاقي اسماعيل عتمان طالع في التلفزيون يقول اللي يعرف حاجة عن انتهاكات الجيش يثبت!!! ده معناه انه عارف كل انتهاكات الجيش..

طولت عليكم معلش.. دي أول تدوينة ليا.. وكنت أكره انها تكون ضد المجلس العسكري لكن الحقيقة كان لازم اشارك في اليوم ده.. عشان اشفي غليلي ضد المجلس واعرفه ان المجلس مش فوق النقد.

أنا نازل يوم 27 مايو.. نازل لأني لسة في فئة "المعارضة"... مع اني أنا اللي عملت الثورة.. نازل لأني مش هاسمح ان الجلس يقول عليا خاين.. وصاحب مصالح خاصة.. انا لا طالب برلمان ولا حزب أنا طالب عدالة مع الناس اللي ثورنا ضدهم.. طالب بوجوه شريفة تدير البلاد.. نازل لأننا ماعملناش ثورة ولا استفتاء عشان ممدوح شاهين يقول ان الإستفتاء كان علي شرعية المجلس!!.. نازل احمي الثورة واجيب حق الشهيد أو احصله

ثورجي علي طول

23/5/2011

12.30 م