فرق شاسع بين الشرطة قبل الثورة .. والشرطة بعد الثورة

لماذا قمنا بالثورة..؟؟ انا لا أعلم لماذا قمنا بالثورة.. انا كنت في الحمام ساعتها..!!

جت علي بالي الجملة دي.. كل ما أحس ان الأيام بتفوت.. والثورة ماحققتش اهدافها الرئيسية.. كله اهداف شكلية.. حبس مبارك في مستشفي 5 نجوم.. محاكمات كارتونية للنظام السابق.. تباطؤ وتواطؤ من القائمين علي المرحلة الإنتقالية.. سواء مجلس عسكري او حتي حكومة "الثورة" حكومة شرف ويحيي الجمل..  اللي سايبين الثورة ومقضيينها سفريات.. شرف في جنوب افريقيا: انتظروا مشاريع قومية عملاقة.. مشاريع ايه ياعم احنا عندنا ثورة عايزين نخلصها .. والجمل بيحضر افتتاح جريدة بتاعة مزة من لبنان .. ورايح يتصور معاها..!! حكومة الثورة :D

.. ده كله مش مهم؟؟!!

نرجع لسؤالنا .. لماذا قمنا بالثورة.. دي كانت ثورة ضد التعذيب والقهر والظلم.. كانت ثورة ضد انتهاكات الداخلية بشكل خاص وضد النظام شكل عام.. حد حاسس بفرق في الشرطة قبل الثورة وبعد الثورة؟؟ 

الصراحة انا حاسس بفرق شاسع.. قبل الثورة كانت الداخلية بيتنططوا علينا وعارفين ان مالهمش كبير وانهم فوق القانون والعقاب... وفي المقابل لما يكون ليك طلب رسمي جوة القسم.. اي اوراق عايز تخلصها أو عايز تعمل محضر عن حاجة مسروقة أة غيره كانت حاجتك بتخلص "طبعا بعد ماتظرف امين الشرطة بريزة".

لكن اللي لاحظته بعد الثورة ان في تغيير فعلا.. في تغيير في الجانب الإيجابي .. التعذيب لسة موجود.. وقلة الأدب لسة موجودة.. والسب وتلفيق التهم لسة موجودين.. لكن اللي اتغير انحتي الخدمات البدائية جداا اللي بتحتجها لما تروح القسم.. وهو انك تعمل محضر عن فقدان شئ او غيره يكون الرد..  مالناش فيه..!!؟؟

الحكاية تبتدي إني كنت في التحرير مع اخويا يوم 27 مايو.. وللأسف كان في تحرشات وشباب جاي يقل أدبه فا من شهامة اخويا فصل بين الشباب والبنات وطلعهم الصينية في وسط الميدان.. وفي الوقت ده حصل تدافع بين الشباب واتسرق منه المحفظة والموبايل.. راح القسم عشان يعمل محضر.. وكان الرد العجيب..!! احنا هانعملك محضر للحاجات اللي هاتعملها بدل فاقد.. لكن موبايلات وفلوس "مالناش فيه"..!!!!

أمال مين اللي ليه..؟؟ يعني لما تتسرق مني حاجة اروح لمين.. لما انتوا كظباط وأمناء بس بتعملوا محاضر استخراج بدل فائد.. ومالكمش دعوة بالمسروقات.. ماحنا ممكن نعتمد في كدة علي موظفين الحكومة و وروحوا اقعدوا في البيت احسن.. وسيبوا مهمة الحفاظ علي الأمن للجان الشعبية.. بدل ماحنا معتمدين علي حيطة مايلة..!! هوده التغيير اللي احنا مستنيينه من الداخلية؟؟

وهل ده الطبيعي في الأقسام دلوقتي.. انهم يرفضوا عمل محاضر بالمسروقات..؟؟ بحجة الإولويات يعني؟؟ واحنا في مرحلة حرجة؟؟ ولا السبب اننا نرجع نقول ولا يوم من ايامك يامبارك؟؟

دي رسالة للداخلية.. ماتفكروش انكم هاترجعوا زي زمان.. ده كان زمن وعدي وعمره ماهايرجع تاني.. ثورتنا كانت ضد الإنتهاكات والتعذيب.. اللي لسة موجود لحد دلوقتي بس مش هايستمر.. الثورة هي اللي هاتستمر لحد مانقضي علي الأساليب الحقيرة اللي انتوا بتتبعوها في شغلكوا .. ويائما تتصلح الداخلية.. يائما تسقط الداخلية.. وشعب مصر كله رجالة يقدر يحمي نفسه.. ويبني من جديد جهاز شرطة نضيف

عاشت مصر.. وعاشت الثورة.. وتسقط وزارة الداخلية اذا لم تتغير